आमदाराच्या हस्ते उदघाटन थाटात, मात्र ३ वर्षापासुन कामाला सुरुवातच नाही ! प्रशासनाच्या कार्यपद्धतीवर प्रश्नचिन्ह
धामणगाव रेल्वे
तालुक्यातील मातोश्री ग्रामसमृद्धी शेत/पांदण रस्ते योजना २०२३-२४ अंतर्गत मंजूर करण्यात आलेल्या पांदण रस्त्यांच्या कामांमध्ये मोठ्या प्रमाणात अनियमितता व भ्रष्टाचार झाल्याचा गंभीर आरोप शेतकऱ्यांसह प्रहार चे तालुका प्रमुख सुरज गंथडे यांच्याकडून करण्यात आला आहे. या संदर्भात प्रहार जनशक्ती पक्षाचे धामणगाव तालुकाध्यक्ष सुरज गंथडे यांच्या नेतृत्वामध्ये धामणगाव तहसील कार्यालय येथे आज १२ मे रोजी निवेदन देत संबंधित ठेकेदारांवर गुन्हे दाखल करून त्यांना ब्लॅकलिस्ट करण्याची मागणी करण्यात आली आहे.
मिळालेल्या माहितीनुसार, तालुक्यातील एकूण २७५ पांदण रस्त्यांचे उद्घाटन मोठ्या थाटामाटात करण्यात आले होते. आमदार प्रताप अडसड यांच्या हस्ते उद्घाटन फलक लावण्यात आले होते. मात्र उद्घाटनानंतरही बहुतांश रस्त्यांची कामे अद्याप सुरूच करण्यात आलेली नसल्याचा आरोप करण्यात आला आहे.
शेतकऱ्यांच्या म्हणण्यानुसार, तालुक्यातील केवळ १५ ते २० पांदण रस्त्यांचीच कामे सुरू झाली, तर उर्वरित बहुतांश कामांना गेल्या चार वर्षांपासून सुरुवातही झालेली नाही. काही ठिकाणी काम न करताच बिले काढण्यात आल्याचीही चर्चा असून त्यामुळे संपूर्ण योजनेत मोठ्या प्रमाणात भ्रष्टाचार झाल्याची शंका व्यक्त केली जात आहे.
निवेदनात तहसील प्रशासनाच्या कार्यपद्धतीवरही प्रश्नचिन्ह उपस्थित करण्यात आले आहे. वेळेत कामे पूर्ण न झाल्यामुळे शेतकऱ्यांना शेतात ये-जा करण्यास मोठ्या अडचणींचा सामना करावा लागत असल्याचे सांगण्यात आले. संबंधित कामांची तात्काळ चौकशी करून दोषी ठेकेदारांवर गुन्हे दाखल करावेत तसेच त्यांना ब्लॅकलिस्ट करण्यात यावे, अशी मागणी करण्यात आली आहे. यासोबतच, “चार ते पाच दिवसांत तालुक्यातील सर्व पांदण रस्त्यांची कामे सुरू झाली नाहीत, तर सर्व शेतकऱ्यांना सोबत घेऊन तहसील कार्यालय व जिल्हाधिकारी कार्यालयासमोर ठिय्या आंदोलन करण्यात येईल,” असा इशाराही निवेदनातून देण्यात आला आहे.
या निवेदनाच्या प्रती मुख्यमंत्री देवेंद्र फडणवीस, उपमुख्यमंत्री एकनाथ शिंदे, महसूल मंत्री तथा पालकमंत्री चंद्रशेखर बावनकुळे, आमदार बच्चू कडू, जिल्हाधिकारी अमरावती तसेच आमदार प्रताप दादा अडसड यांना पाठविण्यात आल्या आहेत.
Add Comment