जुना धामणगाव हद्दीतील सिद्धि- विनायक नगरमध्ये खासगी प्लॉटवर अवैध वाळू साठा ?

ओव्हरलोडेड ट्रक मुळे रस्त्याचे तीन तेरा ; रहिवाशी त्रस्त

धामणगाव रेल्वे

तालुक्यातील जुना धामणगाव ग्रा. प. हद्दीमधील सिद्धि- विनायक नगरमध्ये एका खासगी खुल्या प्लॉटवर मोठ्या प्रमाणात अवैध वाळू साठा जमा असल्याचा प्रकार समोर आला आहे. ज्यामध्ये काळी आणि कन्हान वाळू मिळून अंदाजे १५ ते २० ब्रास अवैध वाळू साठ्याचा समावेश आहे. या वाळूची वाहतूक रात्री १२ वाजता नंतर एक दिवसा पाठोपाठ सतत ट्रकच्या (हायवा) साह्याने होत असून अवैध वाळू वाहतूक करताना पुढे एक कार व मागे एक कारच्या देखरेखी खाली कन्हान व काळी रेती डंपरने टाकल्या जात असल्याचे तेथील स्थानिकांकडून सांगण्यात येत आहे. साठवून ठेवलेल्या रेतीवर चक्क कॅमेराचा पहारा सुद्धा आहे. सुरु असेलेल्या ओव्हरलोडेड ट्रकमुळे पूर्णपणे रस्त्याचे बारा वाजले आहे. त्यामुळे परिसरातील नागरिकांना मोठ्या प्रमाणात अडचणीचा सामना करावा लागत आहे.

अवैध वाळू साठ्यावर चक्क कॅमेराचा पहारा 

सूत्रांकडून मिळालेल्या माहितीनुसार, संबंधित प्लॉटमध्ये कोणतीही अधिकृत परवानगी नसताना अवैध वाळू साठवून, ती विविध ठिकाणी ट्रॅक्टरच्या साह्याने पाठवली जात आहे. या अवैध व्यवसायामुळे शासनाचा लाखो रुपयांचा महसूल बुडत असल्याचा आरोप तेथील नागरिकां कडून करण्यात येत आहे.

सदरच्या वाहतुकीमुळे कॉलनीतील मुख्य रस्ते पूर्णतः खड्डेमय झाल्याने अपघाताची शक्यता वाढली आहे. संबंधित विभागाने तातडीने दखल घेऊन अवैध वाळू साठ्यावर कारवाई करावी, तसेच रस्त्यांची दुरुस्ती करावी, अशी मागणी नागरिकांनी केली आहे. जर प्रशासनाने वेळीच दखल घेतली नाहीत तर आम्ही स्वतः नागरिक रस्त्यावर उतरून त्या अवैध वाळू तस्करावर आमच्या पद्धतीने कारवाई करू यामध्ये जर कुणाच्या जीविताला धोका निर्माण झाला त्याला सर्वस्वी जबाबदार हे प्रशासन राहतील असे मत कॉलनीतील नागरिकांनी दिले आहे.