धामणगावात महिला अधिकाऱ्यांची सलाबादपूर, सोनोरा काकडे रेती घाटात धाडसी कारवाई

२५० ब्रास रेती सह पोकलँड, डिझेल टँकर जप्त – बोटी संक्शन पंप जागेवरच नष्ट

धामणगाव रेल्वे 

 येथील सलाबादपुर, सोनोरा काकडे रेती घाटात अवैध पद्धतीने सुरू असलेल्या रेती उत्खननावर उपविभागीय अधिकारी चांदूर रेल्वे व जिल्हा खनिकर्म अधिकारी अमरावती यांनी संयुक्तरित्या रेती घाटावरदि. ९ एप्रिल २०२६ रोजी दुपारी ३ वाजताच्या दरम्यान धाड टाकत मोठी धाडसी कारवाई  केली आहे..

जिल्हाधिकारी आशिष येरेकर यांच्या मार्गदर्शनाखाली चांदुर रेल्वे येथील उपविभागीय अधिकारी श्रद्धा उदावंत व जिल्हा खनिकर्म अधिकारी प्रणिता चापले अमरावती यांनी संयुक्तरित्या वर्धा नदीलगतच्या सलाबादपूर, सोनोरा काकडे या घाटावर अकस्मित भेट दिली असता त्यांना विना नंबरचा एक पोकलँड तसेच एम एच ४० सीडी ७९३५ नंबर असलेला डिझेल टँकर मोक्यावर आढळून आला. तसेच २५० ब्रास रेती साठ्याचा ढीग अवैध स्वरूपात आढळून आल्याने तलाठी व मंडळ अधिकारी यांनी पंचनामा करून सदरचा रेतीसाठी जप्त करण्याबाबतची कारवाई करण्यात आली असून रेतीसाठा तहसीलदार धामणगाव रेल्वे यांच्याकडे सुपूर्द करण्यात आला आहे. तसेच रेती उत्खनन करण्यासाठी बोटी, संक्शन पंप व इतर उपकरणे जागेवरच नष्ट करण्यात आल्याची कारवाई सुद्धा करण्यात आली. उपविभागीय अधिकारी श्रद्धा उदावंत यांनी सदर ठिकाणी जप्त करण्यात आलेला रेतीसाठाचा गौण खनिज संबंधी शासनाचे प्रचलित नियम व कार्यपद्धतीनुसार जाहीर लिलाव करून त्यापासून प्राप्त होणारा महसूल शासकीय खजिन्यात जमा करण्याबाबतच्या सूचना तहसीलदार धामणगाव रेल्वे याना देण्यात आल्या आहे.

कारवाई दरम्यान धामणगाव येथील नायब तहसीलदार ऋतुराज पटोरकर, देवेंद्र वासनिक नायब तहसीलदार उपविभागीय अधिकारी चांदुर रेल्वे, मंडळ अधिकारी राजेश लाड, व्यंकटी कांबळे, तलाठी आकाश चव्हाण, विनोद जायभाये, अनिल धुळे, बिपिन काळे, रितेश भाकरे, गौरव श्रीराव, शैलेश ढोरे, अनंता मानकर, व पोलीस पाटील आदित्य मानकर तसेच गावातील बरेच नागरिक उपस्थित होते.

महिला अधिकाऱ्यांच्या धाडसी कारवाईचे सर्वस्वी कौतुक

धामणगाव तालुक्यात मोठ्या प्रमाणात रेती तस्कर यांच्याकडून अवैध रेती उत्खनन तसेच चोरटी वाहतूक सुरु असल्याचे उधाण आले असताना महिला अधिकाऱ्यांकडून झालेल्या धाडसी कारवाईमुळे रेती तस्करांचे धाबे दणाणले असून उपविभागीय अधिकारी श्रद्धा उदावंत व व जिल्हा खनिकर्म अधिकारी प्रणिता चापले या दोन्ही महिला अधिकाऱ्यांच्या धाडसी कृत्याचे सर्वस्वी कौतुक होत आहे…