राजकीय नेता मनोहरलाल धाकडच्या महामार्गावरील ‘त्या’ व्हायरल व्हिडीओतील महिला कोण?

धाकड युवा महासभेने हटवले पदावरून

भोपाळ : जनसुर्या मिडिया

मध्य प्रदेशातील मंदसोर जिल्ह्यातील बनी गावातील मनोहरलाल धाकड यांचा दिल्ली-मुंबई एक्सप्रेस वेवर एका महिलेसोबत अश्लील कृत्य करतानाचा व्हिडीओ व्हायरल झाल्याने खळबळ उडाली आहे.

१३ मे २०२५ रोजी रात्री सीसीटीव्ही कॅमेऱ्यात कैद झालेल्या या व्हिडीओत धाकड हे एका पांढऱ्या बलेनो कारमधून (नोंदणी क्रमांक एम पी १४ -सी.सी-४७८२) उतरून रस्त्यावरच महिलेसोबत शारीरिक संबंध ठेवताना दिसत आहेत. या घटनेनंतर भानपुरा पोलिसांनी मनोहरलाल धाकड आणि संबंधित महिलेविरोधात भारतीय दंड संहितेच्या कलम २९६, २८५ आणि ३(५) अंतर्गत गुन्हा दाखल केला आहे.

भाजपने संबंध नाकारला

मनोहरलाल धाकड हे भारतीय जनता पक्षाचे (भाजप) नेते असल्याची चर्चा सुरू झाल्यानंतर मंदसोर भाजप जिल्हाध्यक्ष राजेश दीक्षित यांनी स्पष्टीकरण देत सांगितले की, धाकड हे पक्षाचे प्राथमिक सदस्यही नाहीत. “ते ऑनलाइन माध्यमातून पक्षाचे सदस्य झाले असतील, याची माहिती नाही,” असे दीक्षित यांनी म्हटले. तसेच, भाजपचे राज्य प्रवक्ते यशपाल सिंग सिसोदिया यांनी या कृत्याला “अत्यंत निंदनीय आणि लज्जास्पद” संबोधत पक्ष कोणत्याही गैरवर्तनाला खपवून घेणार नाही, असे जाहीर केले. जर धाकड यांची पक्षाशी कोणतीही संलग्नता आढळल्यास कठोर कारवाई केली जाईल, असेही त्यांनी स्पष्ट केले.

धाकड युवा महासभेने हटवले पदावरून

मनोहरलाल धाकड हे धाकड (किरार) समाजाच्या युवा महासभेचे राष्ट्रीय मंत्री होते. मात्र, व्हिडीओ व्हायरल झाल्यानंतर धाकड महासभेचे राष्ट्रीय अध्यक्ष डॉ. अर्जुन धाकड यांनी त्यांना तात्काळ पदमुक्त केले. “अशा कृत्यामुळे समाजाची आणि संघटनेची प्रतिमा डागाळली आहे,” असे महासभेने जाहीर केले.

पोलिसांचा तपास सुरू

भानपुरा पोलिसांनी स्वतःहून या प्रकरणाची दखल घेतली असून, मनोहरलाल धाकड आणि व्हिडीओतील अन्य व्यक्तीचा शोध घेतला जात आहे. “हा व्हिडीओ भानपुरा पोलिस स्टेशनच्या हद्दीतील दिल्ली-मुंबई एक्सप्रेस वेवरचा आहे. परिवहन विभागाच्या नोंदीनुसार, व्हिडीओतील गाडी धाकड यांच्या नावावर आहे,” अशी माहिती गरोठच्या अतिरिक्त पोलिस अधीक्षक हेमलता कुरिल यांनी दिली. व्हिडीओ व्हायरल झाल्यापासून धाकड यांचा फोन बंद असून, त्यांच्याशी संपर्क साधता आलेला नाही.

राजकीय परिणामांचा अंदाज

मनोहरलाल धाकड यांची पत्नी सोहन बाई या मंदसोर जिल्हा पंचायतीच्या वार्ड क्रमांक ८ मधून भाजप समर्थित निवडून आलेल्या सदस्या आहेत. १७ सदस्यांच्या जिल्हा पंचायतीत भाजप समर्थित ९, तर काँग्रेस समर्थित ८ सदस्य आहेत. धाकड यांच्यावरील कारवाईमुळे त्यांच्या पत्नीच्या राजकीय निष्ठा बदलल्यास स्थानिक राजकारणात मोठा बदल घडू शकतो, अशी चर्चा आहे. काँग्रेसने याप्रकरणी भाजपवर टीका करताना म्हटले की, “व्हिडीओतील महिला ही सरकारी शिक्षिका असून, तिला जबरदस्तीने किंवा प्रलोभनाने या कृत्यासाठी भाग पाडले असण्याची शक्यता आहे. याची निष्पक्ष चौकशी आवश्यक आहे.”

सामाजिक संताप आणि मागण्या

सोशल मीडियावर हा व्हिडीओ तुफान व्हायरल झाल्याने नागरिकांमध्ये तीव्र संताप व्यक्त होत आहे. रस्त्यावर अशा कृत्यामुळे सार्वजनिक ठिकाणी वर्तनाचे नियम आणि नैतिकतेचा प्रश्न उपस्थित झाला आहे. पोलिसांनी या प्रकरणाचा तपास त्वरित पूर्ण करून दोषींवर कठोर कारवाई करावी, अशी मागणी जोर धरत आहे.