चारचाकी वाहन धडकले विजेच्या खांबावर ; रंगोली बार जवळ घडली धक्कादायक घटना

डी.बी. ला सुद्धा लागली भीषण आग ; महावितरण चे लाखोंचे नुकसान

धामणगाव रेल्वे

जुना धामणगाव नजीक रंगोली बार जवळ वाहन चालकाचे नियंत्रण सुटल्याने रोडलगत असलेल्या विजेच्या खांबाला वाहन क्र. एम एच २९ बी पी ५३४५ ने जोरदार धडक दिल्याची धक्कादायक घटना दुपारी ३ च्या सुमारास घडली असून परिसरात मोठी खळबळ उडाली आहे. सुदैवानी कोणतीही जीवितहानी नाही. कारची धडक इतकी जोरदार होती कि, विजेचा लोखंडी खांब अर्ध्यापेक्षा जास्त जमीनदोस्त झाला असून वाकलेला आहे. त्यामुळे जवळच असलेल्या डी. बी. ला सुद्धा मोठ्या प्रमाणात आग लागल्याने महावितरण चे लाखोंचे नुकसान झाल्याची माहिती प्राप्त आहे.

अग्निशामक दलाची गाडी पोहचायला लागला अर्धा तास ?

महावितरण च्या डी.बी. ला आग लागल्याने स्थानिकांनी सदर घटनेची माहिती नगरपरिषद प्रशासनाला दिली. मात्र ३ वाजतापासून अगदी २ किमी अंतरावर असलेल्या नगरपरिषद च्या वाहनाला पोहचायला अर्धातास उशीर झाला. जर वाहन तातडीने घटनास्थळी पोहोचले असते तर नुकसान कमी झाले असते अशी चर्चा उपस्थितांमध्ये रंगली होती. तर कर्मचारी जागेवर उपलब्ध नसल्याने उशीर झाल्याची माहिती एका कर्मचाऱ्याने दिली.

ट्रॅक्टर च्या साह्यायाने परस्पर रफादफा करण्यात आलेले अपघातग्रस्त वाहन

अपघातग्रस्त गाडी परस्पर रफदादा ; पोलीस प्रशासन मात्र घटनेपासून अनभिज्ञ ?

दुपारी ३ च्या सुमारास घडलेल्या वाहन क्र. एम एच २९ बी पी ५३४५ च्या अपघाताने संपूर्ण परिसरात खळबळ उडाली असताना त्यामध्ये महावितरणचे मोठ्या प्रमाणात नुकसान झाले होते. मात्र घटनेनंतर १ तास उलटला असतानासुद्धा पोलीस प्रशासन घटनास्थळी पोहोचले नसल्याने नागरिकांमध्ये आश्चर्य व्यक्त करण्यात आले. याच संधीचा फायदा घेत अपघात ग्रस्त चारचाकी वाहन परस्पर ट्रॅक्टर च्या साह्याने काढून रफादफा करण्यात आले. तर अपघातग्रस्त वाहनामधून अवैध वस्तूची वाहतूक होत असल्याची चर्चा जनसामान्यात सुरु होती. तर घटनास्थळी सुद्धा गाडीमध्ये अवैध वस्तू उपलब्ध असल्याकारणारे तत्परनेतेने गाडी परस्पर काढून रफादफा करण्यात आल्याची खमंग चर्चा उपस्थितांमध्ये सुरु होती.

वाहन क्र. एम एच २९ बी पी ५३४५ मुळे महावितरण चे मोठे नुकसान झाले असताना ते परस्पर रफादफा करण्यात आल्याने वाहन चालक मोठा संशयाच्या भोवऱ्यात सापडला आहे. तसेच ते वाहन नेमके कुणाच्या मालकीचे आहे ? एवढ्या घाईघाईने वाहन नेमके कुठे चालले होते? तर वाहनामध्ये नेमक्या कोणत्या गोष्टी उपलब्ध होत्या ? परस्पर गाडी का रफादफा करण्यात आली ? असे एक ना अनेक प्रश्न या निम्मिताने उपस्थित झाले आहे. त्यामुळे ते अपघातग्रस्त वाहन शोधल्यास मोठा भांडाफोड होण्याची शक्यता नाकारता येत नाही.

गाडी मालकांकडून महावितरण कंपनी ला मिळाली नुकसान भरपाई

वृत्त लिहिस्तोवर गाडी मालकाकडून महावितरण ची झालेली नुकसान भरपाई दिल्याने महावितरण कंपनीच्या वतीने पोलिस प्रशासनाला तसे लेखी दिल्याचे कर्मचाऱ्यांकडून सांगण्यात आले