छत्रपती शिवाजी महाराज महाराजस्व अभियान अंतर्गत शेतकऱ्यांना एकाच छताखाली विविध सुविधा उपलब्ध

दत्तापूर मंडळातील शेतकऱ्यांच्या उपस्थिती पार पडला यशस्वी उपक्रम

धामणगाव रेल्वे

शेतकऱ्यांच्या महसुली अडचणीचे तात्काळ निराकरण व्हावे त्यांची फरफटत कमी व्हावी यासाठी महाराष्ट्र शासनाच्या महसूल विभागाच्या वतीने राबविण्यात येत असलेल्या ‘छत्रपती शिवाजी महाराज महाराजस्व अभियान’ टप्पा-१ अंतर्गत विशेष शिबिराचे आयोजन नुकतेच राजस्व मंडळ दत्तापूर येथे पार पडले. या शिबिराच्या माध्यमातून नागरिकांच्या विविध महसुली अडचणी सोडविण्यावर भर देण्यात आला.

याप्रसंगी कार्यक्रमाचे अध्यक्षस्थान तहसीलदार अभय घोरपडे यांनी भूषविले. तसेच सहाय्यक गटविकास अधिकारी योगेश वानखडे, नायब तहसीलदार ऋतुराज पाटोरकर, प्रफुल देशमुख, भूमी अभिलेख उपाधीक्षक किशोर सानप, तालुका कृषी अधिकारी गजानन राऊत आदी कार्यक्रमाला उपस्थित होते. त्यांनी अभियानाच्या उद्देशावर प्रकाश टाकत, शासनाच्या योजना सामान्यांच्या दारापर्यंत पोहोचवणे हेच या मोहिमेचे उद्दिष्ट असल्याचे सांगितले.

कार्यक्रमाच्या यशस्वी नियोजनासाठी मंडळ अधिकारी संगीता धारणे, ग्राम महसूल अधिकारी तातेश्वर पाटील, राहुल पराते, गणेश उईकें, पल्लवी भोंडे, पूजा बोटरे, विनोद जायभय तसेच मंडळातील सर्व महसूल सहायक यांनी विशेष पुढाकार घेतला. शिबिरामध्ये स्थानिक नागरिकांची मोठ्या संख्येने उपस्थिती होती. यावेळी विविध प्रकारचे दाखले, फेरफार नोंदी आणि इतर शासकीय कागदपत्रांबाबत मार्गदर्शन करून प्रलंबित कामे निकाली काढण्यात आली.

या मोहिमेमुळे नागरिकांना शासकीय कार्यालयांचे उंबरठे झिजवण्याऐवजी एकाच ठिकाणी सर्व सोयी उपलब्ध झाल्याने समाधान व्यक्त करण्यात येत आहे. कार्यक्रमाला महसूल विभागाचे कर्मचारी गावातील प्रतिष्ठित नागरिक तसेच शेतकरी वर्ग मोठ्या प्रमाणात उपस्थित होते…