मुख्याधिकारी डोल्हारकर यांची पत्रकारांसोबत अरेरावी – पत्रकार संरक्षण समिती कडून जाहीर निषेध..!

प्रश्न विचारले म्हणून हिसकावले ओळखपत्र –  महेंद्र भगत, पत्रकार

अंजनगाव सुर्जी : प्रतिनिधी

येथील नगरपरिषदेचे मुख्याधिकारी दादाराव डोल्हारकर यांनी तालुक्यातील एका पत्रकारासोबत अरेरावी करत “तू कुठला आणि कोणत्या पेपरचा पत्रकार, दाखव तुझी आयडी” असे म्हणत पत्रकाराचे ओळखपत्र हिसकावल्याची घटना उघडकीस आली.

आठवडी बाजार येथे मासेमारी व्यावसायिकांनी लावलेल्या दुकान हटविण्याची कारवाई मुख्याधिकारी दादाराव डोल्हारकर यांच्या आदेशाने नगर परिषदेकडून करण्यात आल्याने संतप्त व्यावसायिक यांनी सदर बाब पत्रकार भगत यांना सांगितली असता सदर समस्ये संबंधित चर्चा करण्याकरिता महेंद्र भगत मुख्याधिकारी यांच्या कक्षात गेले असता मुख्याधिकारी यांनी आयडी कार्ड हिसकावत अभद्र वागणूक दिली. त्यामुळे सपुर्ण दिवसभर नगरपरीषद कार्यालयात तणावाचे वातावरण निर्माण झाल्याने अशा मग्रुर आणि मुजोर मुख्याधिकाऱ्या विरोधात कारवाईची मागणी होत आहे.

अंजनगाव सुर्जी नगरपरिषदेचे मुख्याधिकारी दादाराव डोल्हारकर यांच्या सोबत पत्रकार महेंद्र भगत हे आठवडी बाजारातील मासेमारी व्यवसाय करणाऱ्या बाजारातील जागे संदर्भात चर्चा करण्याकरिता गेले होते. यावर मुख्याधिकारी यांनी पत्रकार महेंद्र भगत यांचे आय कार्ड हिसकावले आणि चर्चा करण्याकरिता आलेल्या व्यावसायिकांना अभद्र वागणूक देत त्यांना हाकलून लावले. शहरात गेल्या अनेक वर्षापासून मटन, चिकन, मासे विकणाऱ्या व्यावसायिकांना आपला व्यवसाय करण्यासाठी हक्काची जागा कोठेच नाही, यासंदर्भात या व्यावसायिकांनी गेल्या अनेक वर्षापासून हक्काची जागा मिळावी यासाठी मागणी केली होती. परंतू जागा न मिळाल्याने आठवडी बाजारात आपला व्यवसाय फुलवला. आता व्यवसाय चांगला फुलला असतांना स्थानिक नागरिकांच्या तक्रारीवरुन मुख्याधिकाऱ्यांनी या व्यावसायिकांचे अतिक्रमण काढुन एका ठिकाणी जागा दिली, मात्र या जागेवरुनही आम्हाला पुढे हटवण्यात येऊ नये आणि तेथे आम्हाला कायमस्वरुपी जागा मिळावी या मागणीचे निवेदन घेऊन गेले असता सोबत असलेल्या स्थानिक पत्रकार महेंद्र भगत यांनी मुख्याधिकारी यांना काही प्रश्न विचारले असता मुख्याधिकाऱ्यांचा राग अनावर झाला आणि त्यांनी भगत यांचे आयडी कार्ड हिसकावून घेतले, ही घटना मोबाईल मध्ये रेकॉर्ड झाली असून अशा मग्रुर अधिकाऱ्यावर कारवाई करण्याची मागणी सर्वच स्तरातून होत आहे.

या अगोदर माजी खासदार आनंदराव अडसूड यांचेसोबत या मुख्याधिकाऱ्याने उद्धटपणाची वागणूक दिल्याचे प्रकरण नवीनच असतांना पुन्हा अशी मग्रुरीची भाषा बोलणाऱ्या मुख्याधिकाऱ्यावर निलंबनाची कारवाई व्हावी अशी मागणी “पत्रकार संरक्षण समिती” महाराष्ट्र राज्य होत आहे.