अखिल भारतीय ग्राहक पंचायतच्या पाठपुराव्याला यश

पेट्रोल पंप व शासकीय धान्य वितरणाबाबत प्रशासनाचे कडक निर्देश

धामणगाव रेल्वे

अखिल भारतीय ग्राहक पंचायत, धामणगाव रेल्वे यांच्या वतीने तहसीलदार यांना पेट्रोल-डिझेल पंपांवरील आवश्यक ग्राहक सुविधा नसणे तसेच शासकीय रास्तभाव धान्य दुकानांमधून निकृष्ट दर्जाचे धान्य वितरित होत असल्याबाबत निवेदन सादर करण्यात आले होते. या निवेदनाची दखल घेत प्रशासनाने संबंधित विभागांना आवश्यक कार्यवाहीचे निर्देश दिले आहेत.

तहसीलदारांनी पेट्रोल-डिझेल पंप चालकांना नियमानुसार ग्राहकांसाठी सर्व आवश्यक सुविधा उपलब्ध करून देणे तसेच इंधनाची अचूक मोजणी करूनच वितरण करणे बंधनकारक असल्याचे लेखी आदेश दिले आहेत. या नियमांचे उल्लंघन किंवा त्रुटी आढळल्यास संबंधितांवर कठोर कारवाई करण्यात येईल, असा इशाराही देण्यात आला आहे.

दरम्यान, शासकीय धान्य गोदाम, धामणगाव येथील गोदाम व्यवस्थापक व वाहतूक प्रतिनिधी यांच्या निवेदनाची दखल घेऊन पुरवठा निरीक्षकांनी रास्तभाव धान्य दुकानांची तपासणी केली. तपासणीत निकृष्ट दर्जाच्या धान्याबाबतची बाब सत्य असल्याचे निदर्शनास आले. त्यानंतर निकृष्ट धान्य दुकानदारांना वितरित करू नये, असे स्पष्ट निर्देश देण्यात आले आहेत. तसेच असे धान्य आढळल्यास संबंधित दुकानदारांनी पंचनामा करून ते धान्य तात्काळ शासकीय गोदामात परत पाठविण्याची जबाबदारी राहील, अन्यथा संबंधितांवर कारवाई करण्यात येईल, असेही प्रशासनाने स्पष्ट केले आहे.

याशिवाय, धामणगाव शहरातील सौ. संगीता राजकुमार पसारी यांच्या वॉशिंग मशीनसंदर्भातील ग्राहक तक्रार तसेच देव नारायण पाणीपुरीचे सुरेश गुजर यांच्या डीप फ्रीझर च्या ग्राहक सेवेशी संबंधित अडचणही अखिल भारतीय ग्राहक पंचायतच्या माध्यमातून सोडविण्यात आल्याची माहिती देण्यात आली.

दरम्यान, १ ऑगस्टपासून सुरू होणाऱ्या अखिल भारतीय ग्राहक पंचायतच्या सदस्य नोंदणी अभियानाला नागरिकांनी उत्स्फूर्त प्रतिसाद देऊन सहकार्य करावे, असे आवाहन अध्यक्ष सुभाष देशमुख आणि सचिव शंकर कुर्वे यांनी केले आहे.