ठाणेदार किरण औटे यांच्या नेतृत्वात ५६ लाख ३० हजार रुपयांचा मुद्देमाल जप्त
धामणगाव रेल्वे
अमरावती ग्रामीण पोलिसांनी अवैध रेती वाहतुकीविरोधात धडक मोहीम राबवत तळेगाव दशासर पोलीस स्टेशन हद्दीत मोठी कारवाई केली. या कारवाईत विनारॉयल्टी रेती वाहतूक करणारा हायवा ट्रक जप्त करून तब्बल ५६ लाख ३० हजार रुपयांचा मुद्देमाल जप्त करण्यात आला आहे. अमरावती ग्रामीणचे पोलीस अधीक्षक निकेतन कदम यांनी जिल्ह्यातील सर्व पोलीस ठाण्यांना अवैध रेती वाहतूक, गावठी दारू, हातभट्टी, वरली जुगार व गोवंश वाहतुकीविरोधात कठोर कारवाई करण्याचे निर्देश दिले असताना, मिळालेल्या गोपनीय माहितीच्या आधारे तळेगाव दशासर पोलीस स्टेशनचे पथक हद्दीत गस्त घालत असताना ८ जून सोमवार रोजी सकाळी सुमारे ८ वाजता तळेगाव ते चांदूर रेल्वे मार्गावरील शेंदुर्जना शिवारात छापा टाकण्यात आला.
या कारवाईदरम्यान टाटा हायवा (क्रमांक एम एच २७ डी टी ९४९८ ) अडवून त्याची पंचांसमक्ष तपासणी करण्यात आली. तपासणीमध्ये वाहनात १० ब्रास विनारॉयल्टी काळी रेती आढळून आल्याने पोलिसांनी ५५ लाख रुपयांचा ट्रक आणि 1 लाख ३० हजार रुपयांची रेती असा एकूण ५६ लाख ३० हजार रुपयांचा मुद्देमाल जप्त केला. या प्रकरणी हमीद बुद्धू लुचे तसेच ट्रक मालक मोहम्मद शकील शेख हबीब यांच्याविरुद्ध तळेगाव दशासर पोलीस ठाण्यात गुन्हा दाखल करण्यात आला आहे.
सदर कारवाई पोलीस अधीक्षक निकेतन कदम, अपर पोलीस अधीक्षक दत्ता तोटेवाड, उपविभागीय पोलीस अधिकारी अशोक थोरात आणि स्थानिक गुन्हे शाखेचे पोलीस निरीक्षक किरण वानखेडे यांच्या मार्गदर्शनाखाली करण्यात आली. कारवाईत तळेगाव दशासरचे ठाणेदार किरण औटे, पोहेकॉ अमर काळे, पोशि यशवंत काळे आणि पोकॉ गौतम गवळे यांनी सहभाग घेतला.
अवैध रेती वाहतुकीविरोधातील ही कारवाई परिसरात चर्चेचा विषय ठरली असून अशा प्रकारच्या कारवाया पुढेही सुरू राहणार असल्याचे ठाणेदार किरण औटे यांनी स्पष्ट केले आहे.
Add Comment