देशात अमन-शांतीसाठी ९ वर्षांच्या तस्मिया कशफचा पहिला रोजा

धामणगाव रेल्वे

पवित्र रमजान महिन्यात जिथे मोठे-ज्येष्ठ इबादतीत मग्न असतात, त्याच वेळी धामणगाव रेल्वे शहरातील गोयनका परिसरात राहणाऱ्या एजाज खान यांची नऊ वर्षांच्या चिमुकली तस्मिया कशफ यांनी आपला पहिला रोजा पूर्ण करून सर्वांचे लक्ष वेधले आहे. एवढ्या लहान वयात तिची जिद्द, संयम आणि इबादतीप्रती असलेली निष्ठा पाहून कुटुंबीयांसह परिसरातील नागरिकही भावूक झाले. तस्मिया कशफ ने यावर्षी रमजानमध्ये पहिल्यांदाच रोजा ठेवला. ती बराच काळ रोजा ठेवण्याची इच्छा व्यक्त करत होती. घरातील मोठ्यांना रोजा पाळताना पाहून ती सुद्धा रोजा ठेवण्याचा आग्रह धरत होती. अखेर कुटुंबीयांनी तिच्या भावनांचा आदर करून तिला पहिला रोजा ठेवण्यास परवानगी दिली.

सेहरीसाठी ती पहाटे उत्साहाने उठली आणि दिवसभर संयम, शिस्त व धैर्य राखत रोजा पूर्ण केला. इफ्तारच्या वेळी रोजा सोडताना तिने सर्वप्रथम अल्लाहसमोर हात जोडून देशात अमन-शांती, आपापसातील भाईचारा आणि सामाजिक सौहार्द नांदावे यासाठी दुआ मागितली.
“आपल्या देशात सर्वांनी मिळून-मिसळून राहावे आणि सर्वत्र शांतता नांदावी,” असे तस्मिया कशफ ने सांगितले. तिची निरागस भावना ऐकून उपस्थितांच्या डोळ्यांत पाणी आले. कुटुंबीयांच्या मते तस्मिया अभ्यासातही हुशार असून धार्मिक व सामाजिक मूल्ये समजून घेण्याचा ती प्रयत्न करत असते. परिसरातील नागरिकांनी तिचे कौतुक करून शुभेच्छा व आशीर्वाद दिले.

तस्मिया कशफ च्या या कृतीतून समाजाला सकारात्मक संदेश मिळतो की धर्माचा खरा हेतू मानवता, प्रेम आणि एकता यांना बळ देणे हा आहे. एवढ्या लहान वयात व्यक्त झालेली ही व्यापक विचारसरणी भविष्यात देशात सौहार्द आणि भाईचाऱ्याची भक्कम पायाभरणी करेल, असा विश्वास व्यक्त केला जात आहे.