पेपर लिहिणाऱ्या विद्यार्थ्याला शिक्षकाने कोंबडा कापायला लावला! शिक्षकाचे निलंबन

सरकारी शाळेतील संतापजनक प्रकार

जनसूर्या मीडिया

राजस्थानात एक धक्कादायक असा प्रकार समोर आलाय. एका सरकारी शाळेच्या शिक्षकाने परीक्षा सुरू असताना नववीतील विद्यार्थ्याला बाहेर बोलावून त्याला कोंबडा कापायला लावला. त्यानंतर तो स्वच्छही करून घेतला. या प्रकरणी आता आरोपी शिक्षकावर निलंबनाची कारवाई करण्यात आलीय. राजस्थानच्या उदयपूर जिल्ह्यात हा प्रकार उघडकीस आलाय.

याबाबत मिळालेली माहिती अशी की, एका सरकारी शाळेतील शिक्षकाने परीक्षा सुरू असतानाच नववीच्या विद्यार्थ्याला वर्गातून बाहेर बोलावलं. त्यानंतर त्याच्याकडून कोंबडा कापून घेतला. तसंच विद्यार्थ्याकडूनच तो स्वच्छ करून घेतला. अधिकाऱ्यांनी रविवारी या घटनेची माहिती देताना सांगितलं की, शिक्षकावर निलंबनाची कारवाई केलीय. मोहनलाल डोडा असं शिक्षकाचं नाव आहे. त्याने नववीच्या मुलाला पेपर लिहित असलेलं उठवून कोंबडा कापायला लावल्याचं समोर आलं. यानंतर स्थानिकांमध्ये संतापाची लाट उसळली आहे. गावकऱ्यांनी या घटनेवर संताप व्यक्त करताना मंत्र्याकडे तक्रार केलीय. मंत्र्यांनी आता शिक्षण विभागाकडे या प्रकरणी अहवाल मागवला आहे.

अधिकाऱ्यांनी सांगितलं की, शाळेतील इतर मुलांनी महिन्याभरापासून शाळेत पोषण आहार मिळाला नसल्याची तक्रार केलीय. आरोपी शिक्षकांनी स्वयंपाकींना तिथून हाकलल्याचे आरोप आता होत आहेत. यामुळेच विद्यार्थ्यांनी शालेय पोषण आहार मिळत नाही असं समोर येतंय