टेनिस ते लेदर बॉल: व्यावसायिक क्रिकेटकडे मोठी झेप
धामणगाव रेल्वे
स्थानिक क्रीडा क्षेत्राला व्यावसायिक रूप देण्यासाठी आणि क्रिकेटच्या नकाशावर धामणगावचे नाव कोरण्यासाठी एक कौतुकास्पद पाऊल उचलण्यात आले आहे. येथील मुख्य क्रीडा मैदानावर आर.सी.ए. क्रिकेट क्लबच्या वतीने लेदर बॉल क्रिकेटचे सराव सत्र जोरात सुरू झाले आहे. या क्लबच्या माध्यमातून प्रसिद्ध क्रिकेट प्रशिक्षक विक्रांत पत्रे हे स्वतः मैदानावर उतरून नव्या दमाच्या खेळाडूंना तंत्रशुद्ध प्रशिक्षण देत आहेत.
’RCA’ क्लबमध्ये आंतरराष्ट्रीय दर्जाचे धडे
क्लबच्या व्यावसायिक नियमांनुसार आणि दर्जेदार मानकांनुसार खेळाडूंचा सराव घेतला जात आहे. कडक उन्हाची तमा न बाळगता पांढऱ्या शुभ्र क्रिकेट किटमध्ये सज्ज झालेले हे नवीन खेळाडू मैदानावर घाम गाळत आहेत. खेळपट्टीवर फलंदाजीचे वेगवेगळे फटके, गोलंदाजीची अचूक लाईन-लेन्थ आणि मैदानातील क्षेत्ररक्षणाचे कडक धडे प्रशिक्षक विक्रांत पात्रे यांच्याकडून दिले जात आहेत.
टेनिस ते लेदर बॉल: व्यावसायिक क्रिकेटकडे मोठी झेप
आजवर ग्रामीण आणि निमशहरी भागात टेनिस बॉल क्रिकेटची क्रेझ असली, तरी अधिकृत आणि व्यावसायिक क्रिकेटसाठी लेदर बॉल अत्यंत आवश्यक असतो. आर.सी.ए. क्लबच्या या उपक्रमामुळे धामणगावच्या खेळाडूंना आता उच्च स्तरावरील स्पर्धांमध्ये खेळण्याची आणि निवड समितीचे लक्ष वेधून घेण्याची सुवर्णसंधी मिळणार आहे. नवोदित खेळाडूंचे कौशल्य घासून-पुसून घेण्यासाठी प्रशिक्षकांकडून विशेष मेहनत घेतली जात आहे.
क्रीडाप्रेमींकडून कौतुकाचा वर्षाव
धामणगावात आर.सी.ए. क्लबच्या माध्यमातून सुरू झालेल्या या दर्जेदार क्रिकेट कोचिंगमुळे स्थानिक क्रीडाप्रेमी, पालक आणि खेळाडूंमध्ये प्रचंड उत्साहाचे वातावरण आहे. योग्य मार्गदर्शन, शिस्त आणि आर.सी.ए. चे व्यासपीठ मिळाल्यामुळे धामणगावचे हे खेळाडू भविष्यात मोठ्या संघांमध्ये मजल मारतील, असा विश्वास क्रीडा वर्तुळातून व्यक्त केला जात आहे.
Add Comment