निर्मल उज्वल बँकेची विश्वासाहर्ता पणाला ; कर्मचाऱ्यांनी बँक तिजोरीतून सोन्याची पाकिटे केले लंपास ?

६ संशयित कर्मचाऱ्याविरुद्ध दत्तापूर पोलिसात तक्रार

धामणगाव रेल्वे 

शहरातील मध्यवस्तीत स्थापित असलेल्या निर्मल उज्वल क्रेडिट को. ऑप सोसायटीच्या बँकेच्या तिजोरीतून ग्राहकांनी कर्जासाठी ठेवलेल्या तब्बल ८ सोन्याची पाकिटे बँकेतील अधिकारी व कर्मचाऱ्यांनीच लंपास केल्याचा धक्कादायक प्रकार उघडकीस आला असून संशयित शाखा व्यवस्थापकासह ६ कर्मचाऱ्यावर दत्तापूर पोलिसात तक्रार दाखल करण्यात आली आहे. त्यामुळे शहरात मोठी खळबळ उडाली आहे. सदरच्या प्रकारामुळे ग्राहकांमध्ये गोंधळाचे वातावरण निर्माण झाले आहे. तर बँक व्यवस्थापनेच्या विश्वासाला मोठा धक्का बसला आहे.

प्राप्त माहितीनुसार शहरातील निर्मल उज्वल बँक शाखेत १०१ ग्राहकांनी सोने तारण ठेवले असताना गेल्या काही दिवसात अंतर्गत तपासणीदरम्यान तारण ठेवलेल्या सोन्यापैकी ८ सोन्याची पाकिटे चक्क बँकेच्या तिजोरीतून चोरी गेल्याची धक्कादायक बाब उघडकीस आली आहे. अधिकारी व कर्मचाऱ्यांनी संगतमताने चोरी केली असावी अशा संशयावरून निर्मल उज्वल बँकेच्या नागपूर मुख्यालयाने कर्मचारांना नोटीस बजावून त्यांचे बयान नोंदविण्यात आले होते. दरम्यान बँकेच्या रिजनल मॅनेजर भावना जोशी यांनी बँक शाखेतील सीसीटीव्ही फुटेज, कागदपत्रे आणि आर्थिक व्यवहारांची छाननी केली असता सुरक्षित ठिकाणी असलेल्या सोन्याची पाकिटे गायब असल्याने संबंधित अधिकारी व कर्मचाऱ्यांवर चोरीचा संशय बळावल्याने तसेच चोरी गेलेल्या सोन्याचा शोध लागत नसल्याने दि. १७ फेब्रुवारी रोजी मॅनेजर भावना जोशी यांनी निर्मल उज्वल बँक धा. रे शाखा व्यवस्थापक अनिरुद्ध रावत, शाखा प्रमुख योगेश वानखेडे, रोखपाल हरीश देवगडे, लिपिक प्रतीक्षा भैसे, निखिल क्षीरसागर व शिपाई सुरेंद्र गिरी यांच्या विरुद्ध दत्तापूर पोलिसात तक्रार दाखल केली आहे.

निर्मल उज्वल बँकेमधील सदरच्या प्रकारामुळे ग्राहकांमध्ये मोठा संभ्रम निर्माण झाला असून अनेकांनी बँकेतून आपली रोख काढून घेतल्याची माहिती आहे. तर अनेकांच्या मते बँकच सुरक्षित नाही तर आम्ही विश्वास ठेवायचा कुणावर असा रास्त सवाल उपस्थित करण्यात आला आहे.

निर्मल उज्वल बँक मधील सोन्याची पाकिटे चोरी गेल्याची तक्रार प्राप्त असून त्या प्रकरणाची चौकशी सुरु आहे – गिरीश ताथोड, ठाणेदार दत्तापूर, धामणगाव रेल्वे