मंगरूळ दस्तगीर महावितरण कार्यालयात प्रजासत्ताक दिन उत्साहात साजरा

धामणगाव रेल्वे 

तालुक्यातील मंगरूळ दस्तगीर येथील महावितरण कार्यालयात प्रजासत्ताक दिन मोठ्या उत्साहात आणि देशभक्तीच्या वातावरणात साजरा करण्यात आला. कार्यक्रमाची सुरुवात सहाय्यक अभियंता अख्तर खान यांच्या हस्ते ध्वजारोहणाने झाली. यावेळी उपस्थित अधिकारी व कर्मचाऱ्यांनी राष्ट्रध्वजाला मानवंदना देत देशप्रेमाची भावना व्यक्त केली.

कार्यक्रमाचे सुत्रसंचलन वरिष्ठ तंत्रज्ञ शशीकांत मते यांनी अत्यंत प्रभावीपणे केले. कार्यक्रमात विविध कर्मचाऱ्यांनी मनोगत व्यक्त करीत भारतीय संविधानाचे महत्त्व, कर्तव्यभावना आणि देशसेवेचा संदेश दिला. यामध्ये दीपक कोकडे (यंत्रचालक), सुष्मिता दंदे (वरिष्ठ तंत्रज्ञ), निलेश इंगळे (वरिष्ठ तंत्रज्ञ) व धीरज पांडे (प्रधान तंत्रज्ञ) यांनी मनोगतातून प्रेरणादायी विचार मांडले.

कार्यक्रमाच्या अध्यक्षीय भाषणात अख्तर खान (सहाय्यक अभियंता) यांनी भारतीय संविधानाच्या मूल्यांवर प्रकाश टाकत प्रत्येक कर्मचाऱ्याने आपले कर्तव्य प्रामाणिकपणे पार पाडण्याचे आवाहन केले. तर प्रमुख भाषणात आकाश पाचभाई (कनिष्ठ अभियंता) यांनी महावितरण कर्मचाऱ्यांची जबाबदारी, सेवा भाव आणि संघभावनेचे महत्त्व विशद केले. या कार्यक्रमाला वरिष्ठ तंत्रज्ञ अंकुश पिसे, उमेश कांबळे, निलेश काळकर, प्रकाश राऊत, सुनील पडघन तसेच कंत्राटी कामगार स्वप्निल झोपाटे, रूपेश निचत, संजय इंगळे, अशोक इंगळे उपस्थित होते. सर्व कर्मचाऱ्यांनी एकत्र येत प्रजासत्ताक दिनाचा आनंद द्विगुणित केला. कार्यक्रमाचा समारोप आकाश पाचभाई (कनिष्ठ अभियंता) यांच्या आभार प्रदर्शनाने झाला. त्यांनी सर्व उपस्थित अधिकारी, कर्मचारी व सहकाऱ्यांचे सहकार्याबद्दल आभार मानले. एकूणच मंगरूळ दस्तगीर महावितरण कार्यालयात प्रजासत्ताक दिनाचा कार्यक्रम उत्साहपूर्ण, शिस्तबद्ध व प्रेरणादायी वातावरणात संपन्न झाला.