८० लाख प्रती कि.मी. चा रोड सहा महिन्यातच उखळला ; रामगाव नागरिकांचा “चक्काजाम”

स्टोन क्रशरच्या जड वाहतुकी विरोधात संपूर्ण गावकरी एकवटले – पर्यायी रस्त्याची मागणी

धामणगाव रेल्वे –

गेल्या कित्येक वर्षांपासून वडगाव – रामगाव – धामणगाव रस्ता अत्यंत खराब झाला असताना नागरिकांमार्फत वेळोवेळी निवेदनामार्फत नवीन ट्रस्टची मागणी करण्यात आली होती. त्यामुळे सार्वजनिक बांधकाम विभागामार्फत प्रती कि.मी. ८० लाख रुपये खर्च करून करोडो रुपयांच्या रोडचे बांधकाम २०२४ मधे करण्यात आले. मात्र रोड बांधून पूर्ण एक वर्षसुद्धा झाले नसताना अवघ्या सहा महिन्यातच रोडचे “तीन तेरा नऊ अठरा” झाल्याने रोड बनण्यापूर्वी आणि रोड बनल्यानंतरही त्याच मरण यातना सोसाव्या लागत असल्याने रोड लगत असलेल्या गावकऱ्यांना मोठा प्रश्न उपस्थित झाला. त्यामुळे काही दिवसाअगोदरच सदरच्या रोडने स्टोन क्रशर वरून होणाऱ्या जड वाहतुकीविरोधात वडगाव येथील नागरिकांनी चक्काजाम आंदोलन करून प्रशासनाला नमविले होते. त्याचाच प्रत्यय दि. ११ सप्टेंबर रोजी आला असून संपूर्ण रामगाव येथील महिला – पुरुष, युवक – युवती यांनी रास्तारोको आंदोलन करीत प्रशासनाला धारेवर धरले. त्यामुळे काही काळ वाहतूक खोळंबल्याने एकच धावपळ उडाली..

रामगाव – धामणगाव रोड इस्टिमेट प्रमाणे नाही – नागरिकांचा आरोप

एकीकडे प्रती कि. मी. ८० लाख रुपये खर्च करून सार्वजनिक बांधकाम विभागामार्फत ठेकेदाराने रोडचे बांधकाम केले. मात्र सहा महिन्यातच रोड ची ऐसी तैसी झाल्याने खरंच रोड इस्टिमेट प्रमाणे बनला का ? असा रास्त प्रश्न नागरिकांना पडला आला त्यामुळे संबंधित विभागाने उखडलेल्या रोडची तपासणी करून त्यामध्ये उणीव आढळल्यास त्याच ठेकेदाराकडून पूर्णतः रोड नवीन बनवून घेण्याची मागणी यावेळी ग्रा. प. सदस्य अतुल भोगे यांनी केली.

तहसीलदारांच्या लेखी आश्वासनानंतर नागरिकांचे आंदोलन मागे.

सकाळपासून सुरु झालेल्या आंदोलनाला मोठ्याप्रमाणात नागरिक एकवटले असून ठाणेदार गिरीष थातोड यांच्या नेतृत्वात चोख बंदोबस्त देण्यात आला होता. तर आंदोलनस्थळी तहसीलदार अभय घोरपडे यांनी स्वतः भेट देऊन नागरिकांच्या समस्या ऐकून घेत त्यावर लवकरच तोडगा काढण्यात येईल म्हणून संबंधित विभागाला कार्यवाहीसाठी लेखी सूचना दिल्याने गावकऱ्यांनी आंदोलन मागे घेतले. मात्र दिलेले आश्वासनांची अंमलबजावणी न झाल्यास यापेक्षाही हि तीव्र आंदोलन करण्याचा इशारा गावकऱ्यांच्या वतीने देण्यात आला आहे.

गावातील नागरिकांना तसेच शाळकरी विध्यार्थ्यांना धामणगावला रोडने जाण्यासाठी तारेवरची कसरत करावी लागते. त्यात क्रशर वरील जड वाहतुकीमुळे अनेकदा अपघात झाले असून संपूर्ण रोड खड्डेमय झाला आहे. त्याकरिता आज रास्तारोको आंदोलन करण्यात आले होते. मात्र तहसीलदारांनी दिलेल्या लेखी आश्वासनामुळे हे आंदोलन मागे घेत आहे. मात्र आश्वासनाची अंमलबजावणी न झाल्यास यापेक्षाही तीव्र आंदोलन नागरिकांमार्फत करण्यात येईल..
अल्पेश बन्सोड – नागरिक, रामगाव