संपत्ती हडपण्यासाठी जिवंत बहिणीचा बनविला मृत्यू दाखला ; बहिणीची जिल्हाधिकारीकडे तक्रार

मी अजून जिवंत आहे, संपत्ती हडपणाऱ्या भावाविरोधात महिलेची तक्रार ; प्रशासनाने घेतली दखल

जनसूर्या मीडिया

संपत्ती हडपण्यासाठी काही लोकं कोणत्याही थराला जातात. खोट्या सह्या, बनावट कागदपत्रांपासून ते जिवंत व्यक्तीला मृत दाखवत त्यांची संपत्ती बळवण्याचा प्रयत्न करतात. आता अशीच एक घटना उत्तर प्रदेशात घडली आहे. चुलत भावाने वडिलोपार्जीत संपत्ती बळकावण्यासाठी चक्क बहिणाला मृत दाखवले. बहिणीचा खोटा मृत्यूदाखला बनवून संपत्ती हडपण्याचा प्लॅन बहिणीनेच उधळून लावला आहे.

मिळालेल्या माहितीनुसार, शारदा देवी असे या माहिलेचे नाव आहे. शारदा देवी यांच्या वडिलांनी एकुलत्या एका मुलीला त्याच्या मृत्यूपूर्वी त्याची सर्व मालमत्ता कायदेशीररित्या दिली होती. दरम्यान काही वर्षांनंतर, तिच्या वडिलांच्या मोठ्या भावाच्या मुलांनी तिची मालमत्ता बळकावण्यासाठी बहिणीलाच मृत घोषित केले. शारदा देवी यांना मृत दाखवण्यासाठी कागदपत्रांमध्ये फेरफार केली आणि मालमत्तेची मालकी स्वतःकडे हस्तांतरित केली.

बनावट कागदपत्रे तयार करून शारदा देवी यांची मालमत्ता हडपण्याचे प्रयत्न सुरू केले. दरम्यान आपल्याच चुलत भावाच्या अशा कारनाम्यांबद्दल समजताच शारदा देवी यांनी तहसीलदाराकडे न्याय मागितला, मात्र तेथून काही मदत न मिळाल्याने शारदा देवी जिल्हा दंडाधिकाऱ्यांकडे आपली सगळी कागदपत्रे घेऊन गेल्या.

“मी जिवंत आहे आणि तरीही माझी संपत्ती बळकावण्यासाठी मला मृत घोषित करण्यात आले आहे, असे शारदा देवी यांनी जिल्हा दंडाधिकाऱ्यांना सांगितले आणि सगळी कागदपत्रेही त्यांना दाखवली. यावेळी जिल्हा दंडाधिकारी रवींद्र कुमार यांनी शारदा देवी यांचा प्रकरणात गांभीर्याने लक्ष देण्याचे आदेश दिले.

या महिलेनी केलेली तक्रार वैध आहे. त्यामुळे या प्रकरणाची सखोल चौकशी करा आणि एका आठवड्यात अहवाल सादर करा असे आदेश उपविभागीय दंडाधिकारी (एसडीएम) यांना दिले. जर बनावट मृत्यू प्रमाणपत्र वापरल्याचे आढळून आले तर, प्रमाणपत्र जारी करण्यात सहभागी असलेल्या अधिकाऱ्यांसह सर्व जबाबदार व्यक्तींवर कारवाई केली जाईल, असेही त्यांनी सांगितले.